حچايات من
طرفنا
(4)
زكي رضا
(موقع الناس)
صانع الاستاد استاد ونص
كان النقاش على اشده , بين مجموعة من
الشباب. وهم يحتسون الشاي , عند ابو سامي في
المقهى . حول الاخبار التي تناقلتها الصحف ,
عن وزير داخلية جمهورى اسلامى ايران . وتزويره
لشهادة دكتوراه , من احدى جامعات مانشستر, في
بريطانيا , احدى اهم حلفاء شيطان بزرك .
وتاثير هذا التزوير, على سوق التزوير في سوق
مريدي . وخوف بعض العرانيين ( العراقيين
الايرانيين )من حملة الشهادات الكبيرة , من
اكتشاف امر شهاداتهم المزورة .وعندما تحول
النقاش , الى صراخ بين مؤيد ومعارض , لتزوير
الشهادات تدخل ابو سامي قائلا…
….. عمي على كيفكم , مو مناك العالم هاي
شبيكم .
….. دخلي يتناقشون بلكي نستفاد يا ابو سامي
– رد اسرافيل –
….. اشتستفاد يابه , انت تعرف السالفه وين ؟
….. طبعا ادري , السالفة يم وزير الداخليه
الايراني , اللي لكفوه مزور شهادة دكتوراه .
او بدل ما يحاسبوه , طلع احمدي نجاد كال احنا
دندور , على الشخص اللي قشمر الوزير, وانطاه
شهاده مزوره , بشرفك هاي الدالغه تخش بالعقل .
….. اي يابه وانت شعليك , اللي يسمعك ايكول
عندك تسع شهادات .
….. شلون اني شعليه , لانه اذا الوزير او
طلعت شهادته جذب , اوهو مسؤول عن هوايه جماعه
من اللي عدنه هنا .هذا يعني انه اللي دازهم ,
شهاداتهم مزوره مو صحيح ؟ او ثانيا حتى يعرف
هو وغيره , من انه تزوير سوك مريدي , هوايه
اضبط من تزوير الانكليز .
….. لا مو صحيح – رد ابو سامي – او هسه
افهمك ليش حجيك مو صحيح . اولا الجماعه اللي
عدنا , مو زواج مثل كبل , يرحون يزورون شهادات
, والتزوير ينكشف وتعال عمي شيلني .
….. علكيفك ابو سامي شنو ميزورون شنو بطيخ ,
لعد هاي الجرايد , يوميه تكتب اسماء محافظين
ومسؤولين , ورجال شرطه وجيش . كلهم شهاداتهم
راس كوب , لانهم مثل ما تكول الجرايد , لو همه
جانو طلاب ابتدائيه , لو طلاب متوسطه فاشلين ,
لو ممخلصين اعداديه , يعني قابل كل هاى
الجرايد تكذب .
…..اني كلت الجرايد تكذب … اني كلت
الشهادات بعد مو مزوره . مثل كبل, لانها صادره
من جهات مسؤوله عن هاي الامور ، بدوله شكبرها
شعرضها . صحيح بيها وزير مزور, بس تبقى هاي
جهات مسؤوله.
….. تره صارت ظلمه علي متفهمني بروح والديك
.
….. هسه افهمك . شوف الجماعه جانو عسكر, شبه
نظاميين بالحرب العراقية الايرانية , وما جانو
ايدرسون اصلا , او من وكفت الحرب , رجعو
يشتغلون حالهم حال الناس . هذا اللي فتح دكان
, هذا اللي اشتغل سايق , هذا اللي كام يبيع
باميه .او من اجو البغداد , بعد ما شرد بطل
الحفر والنكر , عادلو رتبهم العسكريه بدرجات
مدنيه . فابو الدكان صارت شهادته دكتوراه ,
وابو الباميه ماجستير , والسايق بكالوريوس
وهكذا .
….. ايباه صدك كال ابو المثل
….. اشكال ابو المثل .
….. كال صانع الاستاد استاد ونص . لان اذا
الاستاذ يزور , فالصناع جابوه قانوني .
….. ايه بس ايظلون كلشي ميفتهمون , وكذابين
لان همه بالاساس ناس شبه اميين .
7 / 10 / 2008
الدنمارك