حامد كعيد الجبوري
عندي صاحب…
من يسولفلّي أعله جَده
أقرَه بعيونَه الفخر
وسبحة الكهرب أبأيده…
وخرزَه ، خرزه
أيسمي أجداده ، لحد سابع ظهر
وجدَه كاتب للأمير…
وهاوِّي للصيد وكنُص
مية سياف أبيمينه …
ومية سياف أبيساره
وميه ، خَياله وراه
وجده من يطرّد غزاله…
أبسهم واحد…
أينيشن أيجيس الرماه
ومره حسيت أبسؤاله ، الكبرياء
ولأن زين أعرف أعرف أطباعه
نص أحاديثه رياء
كال سولفلّي أعله جدَك ؟
كتله آنه أملُـك هويتي
بيها أسمي وأسم أبويه
وأسم جدي وأسم أبوه
والعشيره ….
الماتقدم خبزه لحلوك الجياع
ما يهم بيها الفقير
وبيتنه ، أمن الطين …
وجذوع النخيل
وبنفس هذا سؤالك
كتله بويه أبروح أبوك
تدري جَدي أشيشتغل ؟
ضحك حيل…
أمن الكَلب طلعت ضحكته
وكال يا سبحان ربي
وبنفس هذا السؤال ، أسألت جدك
كال ، يمكن جان راعي…
للسراكيل أبغنمهم
لو مزارع …
يزرع أبكيعان كتاب الأمير
وجان جدك …
يبني ، أكثر من فقير
مامُلك كوخ اليلمه
وعلى أخدوده …
أنطبعت آثار الحصير
وجانت الطيبه صفاته
والوطن دينَه وصلاتَـه
ولا مُلك كبر المماته
ولا ترك ألنه أثر
كتله بويه أجدادي عافولي حمل …
كلش ثكيل
راح انهض …
وأحمل أعباء الرساله
وجَدّي بيَّ أيشيل راسه
وراح أعدلهم مآثر
خلفوا أجدادي شاعر
(بنفسي فخرتُ لا بجدودي)(1)
يكتب التاريخ بيده …
ويصنع المجد الجبير…
أيفرح أجداده أبكبرهم
شاعر ومهوال أبنهم
تجري بشفافه القصايد …
أيعملِـق القِـزم الزغير
ويصلِح السيره وسلوك
وللفخر أسمه يلوك
كلما يتبدل خليفه
أيحصِل الأحسن وظيفه
أبصفة …
…مداح الملوك
***
(*) استفاده من قصيده لشاعر الفصحى كريم جخيوّر
(1) من شطر للمتنبي