بلحظات الضعف ، والانكسار ، والإحباط ، تتأرجح موازين الثبات بين الصمود والهروب ، بين الحلم والحقيقة ، بين العسل والمر ، وهاهو صديقي الشاعر المبدع ( راسم الخطاط ) يوجه لي قاضيةً بحلبة الوطن فماذا أرد عليه ؟ ، لا أدري !!! .
لوين تريد
يبو حجي الحلو ومزعّل التغريد
لوين تريد
يا واهس قصيدة تعيش
ويّ الريح
مثل طفله … وشعرها
أتهده يوم العيد
لوين تريد … لوين تريد
من فرط المحبه … يطيح
دمع العين
وضلوع الصدر
ما حبست التنهيد
لوين تريد
مو تدري السنين
وخلصت طشار
تدور عالفرح
تالي العمر شيفيد
مو ندري السنين
أمذيرات هواي
مثل … لمة فخاتي وحوم
وسط البيد
لوين تريد
إذا جرح …
العمر ملجوم يمته أيهيد
لوين تريد
مو صافن عمرنه
أباب دنيه الآه
مثل شجره
وعليها أمسير جويريد
لوين تريد
مو حتى الحلم
زاعلنه من أزمان
لأن رمده العيون …
وكل حلمها بعيد
لوين تريد
مو بعدك … مثل عصفور
عمري … أبابه ألف عربيد
لوين تريد
يا أول أسم في مهرجان الروح
ضد ليل السياسة وبالعراق تشيد
مثل الله الوطن …
تختار غيره شلون
شجابك للشّرِك
ضل أدعوا للتوحيد
إذا سئلوا ( حسن ) (1) شيكول عن جفاك
شيكله الحفيدك
جده ليش بعيد
عيدية حفيدك
وين لو جه العيد
وين تريد
وين تريد
(1) حسن أصغر أولاد حامد كعيد الجبوري