سولف عالعراق

سولف عالعراق أشما تريد تكول
التقشف عالشعب والحجي ما مشمول

*
الحمد لله البلد مليان بالحجاج
البيت الله الحرام أيفوجون أفواج
أبن ملجم يحج وحج أله الحجاج
الاسم نفس الاسم ويبدلون أشكول

*
صدام الصنم كال أشتراكيه
وكالوها الجماعه دوله دينيه
أحكام وشرع سنيه شيعيه
وآداب التخلي شلون من أنبول

*
النكاح الدرس الأول متعه لو مسيار
أحكام وعباده ومختلف أخبار
بسم الله يسبح ينخه يا ستار
زاهد بالعلن والسر ركص وطبول

*
من كثر العباده وجهه يسطع نور
سوده كصته ومحبس خرز بلور
بأموال الفكر يبني فلل وقصور
ويبوس ايده شكر للنعمه خاف تزول

*
الدشداشه قصيره وقصّر السروال
واللحيه طويله وغتره ماكو عكال
من جيب الفقير أيفرهد الأموال
يحلبهم حلب كلما يريد ينول

*
أخذونه وخيذه الشيعه والسنه
خادم الأجنبي ويمن علي منه
البوك وحرمنه والذبح جاب ألنه
القاصه أتقاسموها وحملوها أعدول

*
حيل وببو زايد عالشعب وأكثر
يسولف عالفساد ويحجي يتشطر
ومن تصير فزعه يختل أتكتر
نايم للظهر ويريد غيره يصول

*
هيهات المذله وبالمذله ينام
الحريه بعيده المشتغل خدام
فك قيدك وحرر روحك الأوهام
فل حزام صبرك عالمرائي صول

***

بابل / العراق