حسين جهيد الحافظ
الصورة رقم (1)
قلم
گال تسمع
گتله اتفضل نعم
گال لا تضحك…. ولا تبچي
لا تكتب ….. ولا تحچي
گتله قصدك
يعني أتحنط صنم
گال لازم…..
…… وگام يتباهه اِبتسم
گتله لكن
بس ما أگدر ما أكتب
لأن آنه قلم
***
الصورة رقم (2)
أول باية
گبل من چان
… يمكن معارض
چان يحترم الرأي الآخر
وچان اِيطالب اِبتقرير المصير
ومن صعد بايه وتعلّه
الرأي الآخر….
…. أصبح اِبشرعه حرام
والمعارض معتدي … تافه … حقير
وأصبحت أم الكبائر
عنده تقرير المصير
الصورة رقم (3)
الأمل مهرة
جيتك مهرتي الأمل … تدفعني أحلامي
عثرات جدمي اِشكثر واِشكثر أوهامي
بس انته ما صدگت يا منبع اِلهامي
اِتصير عثرة درب وألگاك جدّامي
تشطب اِبيدك أكس كل دفتر أيّامي
واِيضيع تعبي هدر
…… والروج عالي الروج
خشبه وعشرتك بحر
………. وأتعبني بيك الفوج
لا بي أعاند بحر
ولاحصلت مرسه
اِعليك أمشي الوفه..
…….. ريحني أرد أنسه
ماريد عمر العشگ
لا فيّه
لا شمسه
طلگت يوم العشگ
وي باچره وأمسه
الصورة رقم (4)
سولة
نحيل وسولتي صبري
خلص صبري
اِنتچيت اِبحسرتي اِعله الون
الوادم عالخمر تدمن
ودليلي اِعله الونين أدمن
حبيبي وصار اِلي عاذل
بعد روحي أشتكي عدمن؟
ولون فاضت سواجي الهم
أسايل من ؟ وأروح اِلمن ؟
أروح المن!!!! …
أروح اِلمن؟
الصورة رقم (5)
ﮔلب أبيض
گلب عندي تعرفه اِنته
أبيض …. للوفه معميل
ما شال الدغش عمره
الصدگ ويّاه كحله وميل
يا مملوح ما بي
اِمن أوصفك حيل
الگمر معجون بالوجنه
ومن لون الشعر
بايگ سواده الليل
الصورة رقم (6)
جرحين
موزين ..!
اِشما أصيرن زين
آنه اِوياك موزين
لأن طبعك عرفته وصار
هاي اِسنين
تود الما يودك
واليودك بيه اِلك جرحين
جرح يوم العرفتك بيه
وجرح… آخ اِشكثرعندك
وكاحة عين
الصورة رقم (7)
دمعة
ما بين اِشوفك حلم
….وبين اِنتظارك عيد
دمعه اِعله خد صورتك
مرسومه راح اِبعيد
الصورة رقم (8)
فدوة
فدوه من تلاكيني
اِمعود لا تصد عينك
تره اِسنيني .. شمع واِيذوب
مامش حيل بي
اِيواكح اِسنينك